एका विदेशी कंपनीक आमच्या देशात एका रस्त्याच्या बांदकामाचें मोठें कंत्राट मेळिल्लें.
कंत्राटांत फायदो बरो मेळपाचो. पुण अडचण अशी आशिल्ली कि रानां वनांतल्यान काट्यां कुट्यांतल्यान रस्तो व्हरप कसो.
विदेशी कंपनी मुखेल्याक सर्वेक्षण करून नकाशा तयार करतना व्हडली अडचण आयली. थंयच्या देशी कंत्राटदाराक ताणें विचारलें, तुमीं असल्या रानांत रस्त्याचें सर्वेक्षण करून नकाशा कसो तयार करतात ?
देशी कंत्राटदारान सहजपणान जाप दिली, आमीं गाढवाचे फाटीर धव्या रंगाचो चुनो भरिल्लो साक दवरतात. त्या साकाच्या दोनीं वटेन इल्लोसो बुराक करतात आनीं गाढवाक ते दिकेन सोडटात.
गाढव जे दिकेन सहजपणान चलत चडत वता ते वाटेर दोनीं वटेन धव्या चुन्याची कुरु / वळी तयार जातात. आमीं ते वाटेन रस्त्याचो नकाशा तयार करून रस्तो तयार करूं सुरवात करतात.
कंत्राटदारान मातसो लजे पडून विचारलें, हांगां सिव्हिल इंजिनियर रस्तो तयार करनात तर ?
देशी कंत्राटदारान हांसत जाप दिली, हांगां जंय गाढव मेळणा, थंय सिव्हिल इंजिनियरच रस्तो  करतातात !
इश्टांनों, हो एका हिन्दी पोस्टाचो अणकार तुमचे मुखार दवरला.
एका काळार अशे तरेन रस्ते तयार करताले. तेन्ना अशिक्षित पुण बुद्धिमान लोक आसताले.
आतां म्हाका सांगात. तुमीं रेल्वेन बेळगांव हुबळी वतना दुदसागरार पळयलां आसतलें. गाडी एक मिनिट थांबता. कित्या थामता तर ती रेल्वे लाईन घालतना अशेच पद्धतीन एका थळाव्या धनगरान रेल्वे कंत्राटदाराक वाट दाखयल्ली खंय.
रेल्वे लाईन यशस्वीपणान घालून जातकच आपणाक व्हडपण घेवपाक बाबड्या धनगराक मारून वडयल्लो खंय. ताच्या आत्म्याक याद करून मान दिवन आर्गां ओपपा खातीर रेल्वे एक मिनटा खातीर थंय थामता अशी अख्यायिका आमीं भुरगेपणांसावन आयकत आयल्यात.
म्हाका दिसता रानां वनांतल्यान दोंगरांतल्यान रस्तो तयार करतना त्या वाठारांत रावपी थळावे धनगर समाजाचे लोक खूप उपेगी पडटाले. कारण ते सगळे वाठार ताणीं पायांपोंदा माडयल्ले आसताले.
काम पुराय जातकच वाट दाखयतल्याक मारून वडवप ही गजाल तेन्ना सर्रास घडटाली.

By Ranjan Naik