Manoj Kamat
देशाच्या ध्वजा म्हज्या
मेकळेपणान हुबत राव
मुक्तीची सासाय तूं
उंच मळबार फांकयत राव
संकश्टां सोंसलीं साबार
रगताचेर आयला भार
एकवटाचें अशोक चक्र
काळजांत अखंड भिनला सांवार
स्वराज्याचें सुटलां वारें
भगवें ल्हार क्रांतीचें
उदात्त शांतताय धव्यांत
पांचवें पर्व उन्नतीचें
सर्वधर्म समभावी विचार
सगळ्या प्रांतांक जोडटले
उतर म्हजें मनिसपणान
मनशाक लागीं ओडटलें
झुजा शंख फुंकलो जाल्यार
निबर हड्डें, रगता धार
नाळी – गुळे, तरसादी, तोफो
उज्या वादळ एकूच प्रहार
शांततायेंत परब्रह्म
जन गण मन म्हणटना
भारताचें भाग्य म्हज्या
निखळ फुडार रंगयतना
‘वंदे मातरम’ म्हणत
निमणो जरी स्वास आसलो
फिरंगी आनी दुस्मान नपयत
उदरगती ध्यास आसलो
भुजांत म्हज्या बळ सदां
किर्त तिनूय दळांनी
संवसाराचेर उतर पावून
जैत सगळ्या मळांनी.
By Manoj N. Kamat
