Manoj Kamat
धीर बळावलो विरांच्या भुजांनी
सळसळ्ळे रगत शिरंतरांनी
हड्ड्याचेर झेलून तुबकाचो फार
धगधगलो क्रांतीचो खर विचार
मेकळीक फिरंग्यांच्या जांचांतल्यान
उबाल्ली चळवळ घरा- घरांतल्यान
धरलो गोंय मुक्तीचो अथक ध्यास
कुडींतलो सोडून जरी गेलो स्वास
भिजली भूंय शितोड्यान रगताच्या
पेटोवन दिवटी, उडी लढ्यांत क्रांतीच्या
मेकळीकेचो गोंयांत घुमलो गाज
गोंयकारांच्या उतराक फुटलो आवाज
जपूक जाय मुक्तीचे सोबीत खीण
उरतले झुजाऱ्यांचे आमचेर रीण
गोंयाक उजू फुडार सदांच आसचो
भौसाच्या नितळ वावरांत तो दिसचो
म्हेळ भ्रश्टाचारी जावचो ना नपयत
फुलचें नव्या क्रांतीचें निखळ जैत
विचार बळादीक जावचो नवो
गोंयांत मुक्ती सासायेचो लागचो दिवो
शांत जावचीं सगळीं वादळ – वारीं
फांतोड येवची सत्याच्या उजवाडावरी
हो धाकटुलोच हावेस गोंयकारांचो
उंच हुबयतना ध्वज भारत देशाचो.
By Manoj N. Kamat
