महाशिवरातीचो तो दीस … दर एक भक्त महादेवाच्या देवळांत देवाधी देव महादेवाचो अशीर्वाद घेवपाक वतालो . गांवच्या देवळांत भक्तांची बरीच गर्दी जाल्ली.. खूबशे भक्त देवळांत देवाच्या पांया कडेन बेल घालून कामाक वचपाचे ताकतिकेन आशिल्ले, देखून ते दुसर्‍यांची नदर चुकोवन मदींच रांकेंत घुसताले. गांवचे शिमेर देवूळ, देवळांत वचपा खातीर शेतांतल्यान वाट काडून वच्चें पडटालें , एक 60 वर्सांचो जाण्टेलो ,चिखलांत रोमिल्ल्या आपल्या बैलाक भायर काडपाचो यत्न करताना सगल्या भक्तांक येतना वताना दिसतालो. तो जाण्टेलो मनीस, कुडीन बळिश्ट ,घटमूट आशिल्लो .

आपली सगली तांक लावन चिखलांत रोमिल्ल्या आपल्या बैलाक भायर काडपाचो येत्न तो करतालो. जायत्या भक्तां कडेन ताणें मजत करपाची विणवणी केली पूण एकल्यानूय बैलाक भायर काडपाक ताची मजत केली ना. ते म्हणतालें…

” तुज्या बैयलाक चिखलांतल्यान भायर काडूंक गेल्यार आमच्या आंगार चिखल लागतलो तो घेवन आमी देवळांत वचूं? आमकां महादेवाचें दर्शन घेवन कामाक वचूंक जाय. तूं काड तुज्या बैलाक चिखलांतल्यान भायर” अशें म्हणून ते चालूंक लागताले. तो जाण्टेलो बाबडो आपल्या त्या बैलाक भायर काडपा खातीर धडपडटालो.

देवळांत वतल्या दरेक भक्ताक ताणें आपल्याक मजत करपा खातीर विणवणी केल्ली पूण एकलोय मनीस ताचे मजतीक आयलोच ना. सामकारूच देवूळ आशील्ल्यान शेतांत रावल्यारूच देवळांतलो देखाव दिसतालो . काय वेळान थंय देवळांत एक साधू महाराज भितर सरलो, त्या साधू महाराजाक दिव्य शक्त आशिल्ली. देव देवळांत ना, आसा ती फकत देवाची फातराची मूर्त हें दिव्य नदरेन सादवाक कळ्ळें. त्याच खिणाक तो साधू महाराज त्या जाण्टेल्या म्हर्‍यांत शेतांत गेलो आनी चिखलात रमिल्ल्या बैलाक भायर काडपाक ताका मजत केली आनी जाण्टेल्याचे पांय धरून म्हणलें…

” हे देवाधी देव, महादेव, तुजी लिला अपरंपार ” तेन्ना जाण्टेल्यान ताका उठयत म्हणलें…

” तूंच खरो भक्त बाकी सगळो दिखाव. हांवें इतली विणवणी करूनय हे स्वताक म्हजे भक्त म्हणपी म्हजे मजतीक येवंक ना.जांच्या मनांत भाव ना ते केन्ना कोणाचे मजतीक पावना. आज हांव जाणा जावन देवळांत रावूंक नाशिल्लो. देवी पार्वतीक हें पटोवन दिवंक जाय आशिल्लें की हें अशें आमचे भक्त.आज हें दृश्य पळोवन देवी पार्वती लेगीत लजेन बावली आसतली. आज महाशिवरातीच्या पवीत्र दिसा भक्त देवळांत वतात देवाचें दर्शन घेवंक पूण देवळांत फकत देवाची मूर्त आशिल्ली. खरो देव शेतांत कश्ट करतालो.”

हें सगलें पळोवन स्वताक जे भक्त समजताले तांणी सगल्यांनी लजेन आपली तकली सकयल घाली.

म्हणटात न्हय… जे दुसर्‍यां मजत करतात तांकांच देव मेळटा.

By Avinash Kunkolkar