होळयेचो रंग हो
कुडींतलेगीत देवूंक जाय
रंगांनी खेळचे खेळून
भावचारान जियेवंक जाय

भगव्या रंगान क्रांत पेटून
देश नवो घडूंक जाय
निळो रंग तितलोच काळजांत
शांततायेन पेवूंक जाय

तांबडो रंग विद्रोही
कुड्डो भावराथ लासूंक जाय
पांचव्या रंगान सैम पेरणी
मनशां मनशांत रुजूंक जाय

गुलाबी रंग मोगाचो
काळजा काळजांक होलमूंक जाय
हडव्या रंगान भरून नवीं किरणां
खोशयेन मनांत पर्जळूक जाय

रंग हे तना – मनांत
हळूच देवून येवंक जाय
देश म्हजो एकाच रंगान
संवसाराचेर फांकूंक जाय

नासचो रंग एकाच दिसाचो
जिवीत तांणें रंगोवंक जाय

राग – व्देश करून पयस
घावे सगळे पेखोवंक जाय.

By Manoj N. Kamat