उपकार करून
म्हज्या देशाच्या स्वाभिमाना कडेन
असो खेळ
मांडूं नाकात!
शेंबडें पोंर
हातांत ही येसाची घुडी घेवन
ताचें गिरगिरें करून
काळजाक बुराक
घालूं नाकात!
राजा महाराजांचो रथ धांवडायतना
सारथ्याच्या फाटल्यान तरंगतना
हो ध्वज जैताची गवाय
ताका इतलो सवाय
करूं नाकात!
बावटो हुबयात
पूण ताचो करून खुळखुळो
ताका खिळखिळो
करूं नाकात!
झंडा उंचा रहे हमारा म्हणत
तो आड्याक तेकोवन
ताका मातये भरवण
करूं नाकात!
पयलीं तो
गाडयेच्या डेशबोर्डार मानान बसतालो
आतां ताका
फाटल्या हारशार
दसोवंक नाकात!
जल हर घर
नल घर घर
तिरंगा हर घर
लावपा इतलो स्वस्त ताका
करूं नाकात!
तकलेर ध्वजाचो मुकूट घालून
मोटरसायकली वेल्यान
स्टंट करपी तरनाट्यांनो
वाद्र्यो ताच्यो
करूं नाकात!
ताचे राखणे खातीर
शूर विरांनी दिल्लें आपलें शीर
ताची याद ना म्हणून
फकाणां ताचीं
करूं नाकात!
हे ध्वजा
तुजी धजा….
न्हय गा मजा
प्राणा म्हज्या
भोगता तूं ही कसली सजा?
भोगता तूं ही कसली सजा?
— प्रकाश द. नायक

Prakash Naik