इश्टांनों, भुरगेपणां तिनसांजचें सालांत ल्हान व्हड भुरगीं वण्टीक तेकून हात जोडून उबीं रावन परवड म्हणटालीं श्रीगणेशाय नम : एक ते तीस पाडे, पावकी दिडकीचो सुद्धां हातूंत आसपाव आसतालो.शाळेंत शिकतना एक उमेद आसताली. जे यत्तेंत शिकताले ते यत्तेचीं पुस्तकां हातांत पडले बरोबर तीं उपाशीं आशिल्लेभशेन वाचून काडप.फकत आमचेच न्हीं तर व्हडल्या भावा भयणींचे यत्तेंतलीं पुस्तकां सुद्धां. वाचूं समजूं कळणा त्या पुस्तकांतलीं चित्रां फोटो पळवन समादान करून घेवप. अशे तरेन तिसरे यत्तेंत शिकतल्यांक चौथेचे धडे खबर आसताले. हांव शाळेंत शिकतना खानापूर सातारा बेळगांव वाठारांतले चार पांच शिक्षक हातांत काळें काशेद पिजाम घालून आयिल्ले. आमच्या घरा लागींच काकाल्या घरां बिराडाक आशिल्ले. म्हज्या बाबाची तांचेकडेन बरी इश्टागत आशिल्ल्यान म्हाका तांचो भंय दिसनाशिल्लो.चौथी मेरेन कोणाकच ए बी सी डी कळणा आशिल्ली.

एक दिस हांवें म्हजें नांव इंग्रजींत बरवपाचो प्रयत्न केलो. RJN आनीं R चेर अनुस्वार दिवन गुरुजीक दाखयलें. गुरुजी पळवन वग्गी रावलो. तशें न्हीं अशें बरवप म्हणून सांगूं ना. कारण ते सगळे सातवी यत्ता पास जाल्ले खंय, भौतेक इंग्रजी कळनाशिल्ली.पांचवे यत्तेंत पावलों. सरान आमकां ” व्हडली ABCD ” चिरपा घाली दुसऱ्या आठवड्यात ” धाकली abcd ” घाली. तिसऱ्या आठवड्यात इंग्रजी हिस्ट्री सिविक्स सायन्स जियोग्राफी शिकवपा सुरू.खरें म्हळ्यार मराठीतल्यान इंग्रजी माध्यमाच्या स्कूलांत पावतकच पयले तीन म्हयने तरी word / sentence formation, reading, writing वेवस्थित जावप गरजेचें आसता. ताका लागून भुरगे हिन्दी मराठी सोडल्यार भौतेक विशयांत नपास जाताले.सर बोर्डाचेर question answer बरयतालो. ताचें अक्षर कयणाशिल्लें. आमीं तें बरवन घेवप. सर हें कितें अशें विचारल्यार मार पडटालो. उच्चार कळनाशिल्ले, याद उरनाशिल्ले. म्हणटकच तांचे सकल पेन्सिलींन देवनागरी लिपींत उच्चार बरवन पाठ करप. word आनीं sentence formation केन्ना शिकयलेंच ना. शिवाय वर्ड अर्ली वर्ल्ड या उतरांत R चो उच्चार compulsory आसतालो ! नाजाल्यार मार पडटालो. ( अशे तरेन उतरांतल्या प्रत्येक अक्षराक मान दिवचोच पडटालो ! एखादें अक्षर silent आसता हें आमकां खबर नाशिल्लें ! )पांचवे यत्तेंत पाटील हो बेळगांवचो शिक्षक mathematics शिकयतालो. इंग्रजी सारकी कळणाशिल्ली. तो उलयतालो ती मराठी सुद्धां समजनाशिल्ली. साॅराॅ पिल्ले भशेन ताचें उलवप. बरें, जाप काडूं मेळनाशिल्ली. तो हेडमास्तर आशिल्लो. अशे तरेन आमच्या mathematics विशयाचे तीन तेरा वाजले.

सातवेक पावतकच ख्रिश्चन टीचर आयली. ती पुराय इंग्रजींतल्यान mathematics शिकयताली. म्हणटकच तिगेलें शिकवप सगळ्यांच्याच माथ्यावयल्यान वतालें.आमचें सावर्डेचें स्कूल सातवी मेरेन आशिल्लें म्हणटकच कुडचड्यार हायस्कूलांत गेले. थंय आठवेक थाॅमस बाबू नांवाचो केरळियन सर algebra geometry शिकयतालो. ताच्या केरलाय्ट उच्चारां लागून आमीं गोंदळां पडटाले.तो मदींच सोडून वतकच आमकां कलावती हेगडे टीचर आयली. हुशार आनीं बरी. भौतेक कोंकणीच उलयताली. धावी यत्तेंतबी तीणेंच शिकयलें. पुण गणित विषयाबद्दल मनांत एक तरेचो तिरस्कारच निर्माण जाल्लो. कारण आमची mathematics ची बुनियादच कमजोर आशिल्ली. म्हणटकच धावेक गणित विशयात काठार पास जालों. परत आनीं त्या विशयाचे वाटेक गेलों ना ! काॅलेजींत पावतकच कळ्ळां किं R चो उच्चार silent आसचो आनीं इंग्रजी भाशेंत ” र  ” हें अक्षर ना, अशे तरेच्यो जायत्यो गजाली लक्षांत आयल्यो. कारण इंग्रजी माध्यमातल्या विद्यार्थ्यांबरोबर आमचो संबंद आयलो आनीं इंग्रजी उच्चारांतलो फरक लक्षांत आयलो.

By Ranjan Naik