सामान्यांनो
तुमी जगपाचे नाच?
काल तिकीट वाड
आयज गॅस वाड
फाल्यां पेट्रोल वाड
परवां डिजल वाड!
सामान्यांनो
तुमकां मुतपाकूय पयशे पडटात
हांगां हागपाकूय पयशे लागतात!
सामान्यांनो
खऱ्यांनीच तुमी स्वतंत्र देशांत जगतात?
गाडयेचो रस्तोकर तुमीच भरतात
तरीय वाटे वाटेर टोल भरतात
गाडी उबी केल्यार २० रुपयांची
पार्कींग फीची रिसीट जिवाक उबगून
तुमकां घेवंचीच लागता!
सामान्यांनो
नागडे उरचे न्हय म्हणून तुमी
आंगार वस्रां ओडटात
थंयूय विक्री कर भरतात!
सामान्यांनो
जीव वचना देखून तुमी जगतात
जगपाक जाय म्हणून
सकाळची भाकरी खातात
दनपारची उणी गिळटात
सांजचे मिक्स भाजयेंत लिंबू पिळटात
राती कडेन पेजे नीस पितात
१८ टक्के जी एस टींत तुमी
दिसभर पिळून गेल्ले आसतात!
सामान्यांनो
देवळा भायर तुमचींच जोतीं आसतात
दर जोत्याक पांच रुपया आकारतात
हाराचे पन्नास, उजवातींचे धा
फंडपेटयेंत तुमच्याच बोल्सांतले
धा घालचे पडटात!
सामान्यांनो
सगलोच ‘अर्थ’
बदलाक तीर्थ
घांटीचो नाद
उजवातींचो घमघम
तेला वातींचो लखलख
आनी बचकभर पंचखाद्य
तुमच्या मुखार साकारतात!
सामान्यांनो
तुमीच मनोमन करतात नमस्कार
अपेक्षेन कितेंय तरी जिणेंत
घडटलो चमत्कार
देवळांत प्रसाद म्हणून दिल्ल्यो पाकळ्यो
सुकून वतात बोल्सांत
तरीय तांचो वास राखून दवरतात पोशांत!
सामान्यांनो
दर वर्सा तुमीच भरतात
तुमचे गांठीक कांयच उरनाशिल्ले
मिळकतीचेर आयकर
दितात तुमीच एक संतुश्टेचो धेकर
एक दीस लागता दोतोर
लागता वखदांची रास
पयशांचो गोमटेक लागता फांस
आतां एकदाचो वचपाचोच ध्यास!
सामान्यांनो
घेयात तुमी तोंडांत तुळशीचें पान
मुखार अटंगें रान
भगभगता पळय तुजेंच सरण
तें पळोवपाक मात तुज्यांत उरना प्राण!

By Prakash Naik