हारसो आनी मुंडली
हांव सदचे भशेन
आयजूय
त्याच नक्षीदार हारशांत पळयतालो
पूण आयज हांव
म्हाका सदचे भशेन दिसलो ना
कांय खीण हांवें
ते नक्षीक पळोवपाक वगडायले
कांय खीण हांवें
तोंड वांकडें तिकडें केलें
हांवें गंभीर जावन पळयलें
हांवें हांव खंबीर आशिल्ल्याचें
नाटक करून पळयलें
रडकुळो जावन पळयलें
मदींच हांसरो जावन पळयलें
सकयल जमनी कडेन पळयलें
वयर मळबा कडेन पळयलें
मुद्रेंत जायते बदल करून पळयलें
पूण हांव म्हाका
सदचे भशेन दिसलोच ना !
हारसो सांगतालो म्हाका
हांव म्हज्या म्हाकाच फटयता म्हणून
एक तर म्हज्या
दोळ्यांच्या मुंडल्यांच्यो कंवच्यो जाल्ल्यो
वा
म्हज्या त्या नक्षीदार
हारशाचेर सरे ओडिल्ले
आतां मुंडल्यांक हारसो दिसनासलो
आनी
हारशाक कंवच्यो!
एके वटेन हारसो धृतराष्ट्र जाल्लो
आनी मुंडल्यो गांधारी!
धृतराष्ट्र् सैमीक काळखी…
तो उजवाड सोदी
गांधारी कृत्रिम…
आनी ती मात सोदी काळोख!
हांव
म्हाका सदचे भशेन दिसलोच ना

By Prakash Naik