ही काणी न्हय तुजी
ना म्हूण म्हजी
ही काणी निकट्या वेळाची
ह्या वेळान आमकां
सहज लागीं हाडलीं
सगळ्यांक मात दिसलें
आमी मोगान पडलीं
स्वता खातीर वेळान
रचिल्लो हो दाव
एका बाजून तूं
दुसरे बाजून हांव
ह्याच वेळाक साक्षी दवरून
तुज्या स्वासाक हांव भेटलें
वेळाचीच चाल ही
अर्द्यारूच हांव तुटलें
काळजान मात थारायलो
विस्वास घातकी तुका
खरो दोशी हो वेळ
कशें समजावं ताका
ह्याच खातीर आतां
झूज हांव मांडटलें
न्यायालयिच्या कटघ-यांत
वेळाक घश्टीत हाडटलें
आनीक तेन्ना…
आपल्याक निर्दोश साबीत करूंक
हो वेळ धडपडटलो
साक्षी नाशिल्ल्या कारणान
फुगार जावन रडटलो
इतलें आसुनय…
एकूच भंय मनांत निर्माण
आयज पासून खंयच्याय न्यायादिशान
वेळाक मारलां फर्माण???

By Guadalupe Dias