Guadalupe Dias
आयज मळबांत हजार रंग
रंग म्हज्या यादींचे
भुरगेपणार खेळटाले त्या
तें पळय तेरेझीन
मीठ हाडूंक धांवता
आपटल्ल्या कोंप्रांतल्यान
रगत ताचें व्हांवता
आंजे-गुंजे म्हणत रोझीन
घोवाक कुळण्यांत वाडला
जांबळां कुटूंक माकड कसो
ग्लोरीओ जांबळीर चडला
कुड्या पानांत एकठायल्या
चुन्ना – कांड्डांची रास
लुर्दीनाच्या केंसांक मारता
हुमल्यांचो वास
नळकुट्या परस कंयसूचें
उजवें पावल झरलां
’तुमी रोडी खेळटात’
पलाशान तेम धरलां
लगो-यांच्या डावाक
मिंगलून हावेस दाळ्ळा
चिंतून पावल मारपी मंत्र
ताबलां फळयेर मेळ्ळा
रंग साबार यादींचे
मळबाची आयज गिरेस्तकाय
खेळूय सगळे मनांत सुगूर
इश्ट खंय सांडले काय
By Guadalupe Dias
Manoj Kamat
