णव दीस झूंज करून,
रामान रावणाक मारलो .
महेशासुराचो कांटो काडूक,
दुर्गेन अवतार घेतलो .

बळ दाखोवन लोकांक पिडपी,
नरकासुराचो वध कृष्णान केलो .
म्हूण दिवे,पणट्यो पेटोवन,
सगळो वाटार परजळीत केलो.

आयज सगलेकडेन चडला माज,
पिडपी, नाडपी आनी लुटप्यांचो,
लांच घेवन बाॅल्सां भरप्यांचो,
नरकासुराच्या साबार वंशजांचो.

वचत थंय जाला सुळसुळाट,
रानां कापून मळां करप्यांचो.
पिकाळ जमनीर कोयर करून,
सैमीक संतुलन इबाडप्यांचो.

गरज सगळ्यांनी धगधगून उठपाची,
दुष्ट प्रवृत्तीआड जनमत करपाची,
असंख्य राम,कृष्ण, दुर्गा जवपाची,
असल्या असुरांक नानपयत करपाची
आनी
सगळ्या संवसारार सुखशांती हाडपाची.

By Subhash Lotlikar