Prakash Naik
भर दनपार
झाडापोंदा बशिल्ली
झाडापेडार जळीमळी
हालत्यो खांदयो
हालतीच पानजाळी
केन्ना वोत
केन्ना सावळी
पेडांत रिगिल्लें
झाडाचें मूळ
वयर वारो
हालयतालो ताळ
भिरीभिरी सळसळ
एक पान तुट्टालें
माथ्यार येवन पडटालें
मेंदवाच्या कुडक्यांनी रिगतालें
देठांतली पाचवीसाण
दोळ्यांनी शेळ ओलसाण
दुसरें पान झडटालें
भुजाचेर अडटालें
शिरंतरांनी कडटालें
आकाराचें क्षेत्रफळ
वाडयतालें भुजबळ
तिसरें पान
विसावतालें मांडयेर
माणकुल्यावरी म्हणटालें
कुरु कुरु कानां
म्हशी गेल्यो रानां
म्हशीक सोदतना
रानूच शेणटालें
चौथें पान
पावलांर न्हिदतालें
झाड नतमस्तक जातालें
म्हाकाच नवे कोंब फुट्टाले
चरणाक फुट्टाली नवीं मुळां
आनी आंगभर धवीं पाळां
By Prakash Naik
Manoj Kamat
