Ranjan Naik
इश्टांनों, आज फेसबुकार सहज नजर मारतना, एका पोस्टान म्हजें लक्ष ओडून घेतलें.
कपड्यांक फेर्र मारपी / इस्त्री करपी एक वेवसायिक कपड्यांक फेर्र मारतना दिसता. ताच्या हातांत वीजेचेर चलपासारकें फेर्र दिसता. पुण त्या फेर्राक वीजेचें वायरीचें कनेक्शन ना, तर ट्यूब वा पायपाचें कनेक्शन आसा. तें पायप वा ट्यूब एल पी जी गॅस सिलिंडराक जोडला आनीं तें फेर्र ताचेर म्हणजे उज्याचेर चलता खंय. जसो गॅस लायटरान आमीं गॅस पेटयतात तसोच फेर्राक बसयल्ल्या बटनान फेर्राभितर उजो पेटटा आनीं जायतेन्ना बंद करूं येता.हे खातीर ताका म्हयन्याक एक सिलिंडर लागता खंय. असलें हें फेर्र हांवें पयले फावट पळयलें.
सहज म्हजें मन भूतकाळांत भुरगेपणांत गेलें. पयले फावट हांवें फेर्र मारप पळयल्लें, ताका फेर्र म्हणूं मेळचें ना. फकत हांव फेर्र मारतां अशें म्हणूं मेळटालें आनीं तें फेर्राचें काम करतालें. दाट धातूच्या तांबयांत पेटिल्ले कोळशे घालून तो तापोवन कपड्यांक फेर्र मारताले. कोळसो वा कीट कपड्यांचेर पडपाची भिरांत नासताली. फकत तांबयाक धरपाक मुठींक दाट कपडो धरचो पडटालो.
मागिर लोखणाचे बनावटीचे अधिकृत फेर्र आयलें. वयल्यान उगडपाचें. तातूंत भौतेक करून कट्टी जळवन तें धापून लाॅक करप. फेर्र मारतना धरपाक मुठींत कपड्याची गरज नाशिल्ली, कारण ताका लाकडाचें हॅण्डल आसतालें. पुण आमीं ताका कपडो गुटलायताले.
हांव सगळ्यांत ल्हान आशिल्लों. व्हडले भाव कपड्यांक फेर्र मारलेबगर घालनाशिल्ले. म्हगेल्या कपड्यांकयबी फेर्र मारून दिताले.
पांचवी यत्तेंत पडटकच हांवें फेर्र तापोंवंक, मारूंक सुरवात केली. तेन्नासावन फेर्र मारलेबगर केन्नाच कपडे घाले नात. ह्या फेर्राक एक वायट संवंय आशिल्ली. दोनीं वटेन हवेक लागून आशिल्ल्या बुराकांतल्यान कपड्याचेर उज्याची किट्टी वा बारीक कोळसो पडून काळ्या जळिल्ल्या दागांचे डीझाईन जाताले !
घरांत वीज कनेक्शन आयलें. वीजेचेर चलपी फेर्र आयलें. ह्या फेर्रा लागून कट्टी घालून उजो पेटोवपाचे त्रास सपले. पुण दोगांय भितर एक समान दोश आशिल्लो तो म्हळ्यार तें कितलें तापलां हें कळूं वाव नाशिल्लो. म्हणटकच नाका आशिल्ल्या कपड्याचेर आदीं प्रयोग करून पळवचो पडटालो. जसो नव्या वखदाचो वा इंजेक्शनाचो प्रयोग गिनिपी प्राण्याचेर करतात !
उपरान्त ही अडचणयबी पयस जाली. ऑटोमॅटिक फेर्र आयलें. आदलीं फेर्रां जड आसतालीं. हें फेर्र ल्हव. कपडे जळपाची भिरांत नाशिल्ली कारण आमकां जाय तितलें तापतकच तांबडी लायट बंद जाताली.
हालीं लाॅण्ड्रिंत आनीं घरांतय वापरपाचीं फेर्रां आयल्यांत जीं वापरतना कपड्यांचेर उदक फाफूडपाची गरज पडना. बटन दामतकच उदकाची वाफ कपड्यांचेर पडटा.
हालींतर आकारान ल्हान इल्लींशीं अपुरबायेचीं फेर्रांय आयल्यांत, जीं खासाकरून भोंवडेर वतना बॅगांत दवरून व्हरपाक मेळटात.
कपडे उत्पादन कारखान्यात आतां फेर्र वापरपाची गरज ना. आपूणशींच कपड्यांक फेर्र मारून घडी मारून भायर येता. फकत सुरवेक कपडो वेवस्थित घालचो पडटा. व्हडली चादर सुद्धां कांय सेकंदांत घडी मारून भायर सरता !
By Ranjan Naik
Manoj Kamat
