टंकलेखन म्हळ्यार टायपिंग. आज टंकलेखन यंत्र म्हळ्यार टायपरायटर इतिहासजमा जाल्यात. कार्यालयांत टाईपरायटर वखदासुद्धां पळंवंक मेळणा. ताची सुवात आतां संगणक म्हळ्यार कम्प्युटरान घेतल्या.

कांय वरसां फाटीं सुद्धां कार्यालय म्हळें किं थंय उण्यातउणो एक तरी टाईपरायटर आसतालोच. सर्वसामान्य कार्यालयात एक तरी टायपिस्ट आसतालोच, भोवतेक चली वा बायलमनिस आसतालीच. टायपरायटराची टीक टीक आयकूं येताली.

तशें टायपिंग कोणी करूं शकतालो. पुण ताचें शास्त्रोक्त शिक्षण – प्रशिक्षण घेवचें पडटालें. भौतेक शारांत आनीं नगरांत टायपरायटिंग इन्स्टिट्यूट आसतालें आनीं बरें चलतालें. आमच्या कुडचड्यार ऍडलिझ आनीं बोरकर टायपिंग इन्स्टिट्यूट आशिल्लीं.

हार्मोनियम वाजोंवंक शिकतना सा रे ग म प ध नी सा वा व्हायोलिन वाजोंवंक शिकतना इंग्रजी भाशेंत दो रे मी फा सो ला सी दो हो मुळावो पाठ आसता, तशेंच टायपिंग शिकतना a s d f ; l k j h हो पयलो पाठ आसतालो. हातूंत संगीत वाद्याचेर प्रत्येक सुराचेर हाताचें ठराविक बाॅट दवरप थरिल्लें आसतालें, तशेंच टाईपरायटरचेर सुद्धां प्रत्येक अक्षर वा कुरूक थराविक बाॅट थरिल्लें आसतालें.

आमच्या सावर्डे गांवात कांय वरसां आदीं एक सरपंच टायपिंग शिकूं नाशिल्लो पुण तो एकच बाॅटान टायपिंग करतालो. आपलो वेव्हार वेवस्थित करतालो.

एक गजाल सेर्त आशिल्ली, आदल्या वेळार फुडें आपूण कसलें शिक्षण घेतलो वा आपुण खंयच्या मळार फुडार करतलो हाचो सर्वसामान्य भुरग्यांनीं विचार केल्लो नासतालो. सर्वसामान्य भुरगे अकरावी बारावी यत्तेंत कला वा वाणिज्य मळार प्रवेश घेताले म्हणटकच साहजिकच तातूंतले भोवतेक जाण फुडारा बऱ्या पडटलें म्हणून टायपिंग शिकताले.

गोवा एस एस सी बोर्ड स्थापन जावचेआदीं गोंयांत पुणे बोर्डाची अकरावी एस एस सी आशिल्ली. विद्यार्थ्यांक गणित विशयाचे बदला टायपिंग हो विशय म्हणून घेवपाची मेकळीक आसताली. हाका लागून खूपशे भुरगे टायपिंग विशय घेताले आनी अनायासे टायपिंग शिकून पडटालें.

ऍडलिझ टायपिंग इन्स्टिट्यूट हांगां हांव टायपिंग शिकलों. 30 speed आनीं 40 speed अशे दोन कोर्स आसताले. 30 speed म्हळ्यार एका मिनटांत 30 words आनीं 40 speed म्हळ्यार एका मिनटांत 40 words टायप करपाचे क्षमता परिक्षेंत उत्तीर्ण जावप.

हांव 30 speed शिकतालों. वर्सभर प्रशिक्षण घेतकच जावपी परिक्षा मजेशीर आशिल्ली.

परिक्षा बोर्डा – मडगांवच्या मल्टिपर्पज हायस्कूल सभागृहात आसताली. पिकअपींत घालून आमचे सगळे टाईपरायटर थंय व्हेल्ले. सभागृहात एका मेजार दोन / चार टायपरायटर दवरून आमकां बसयलें.

सुमार शंभरेक टायपरायटर आसूंये. आमकां सगळ्यांमुखार मेजार धा मिनिटांत 300 words चो टायप केल्लो एक परिच्छेद म्हळ्यार paragraph दवरलो. टण्ण करून घंटा वाजली म्हणटकच टायप करपा सुरवात करप.

ज्या टाईपरायटराचेर हांव सदां बसतालों तो आनीं कोणातरी मेळ्ळो आनीं म्हाका सादारणसो दुसरोच टाईपरायटर मेळ्ळो. तो वेवस्थित चलना आशिल्लो. सैल पडिल्लो.

टण्ण करून आवाज जालो आनीं एकबरोबर शंभर टायपरायटांचेर टायप करपाचो घडघड करून एकदम व्हडलो आवाज जालो. खीणभर इमारतीचो टेर्रासच कोसळल्याभशेन आवाज जालो आनीं जायत रावलो. आमकां हाचो अणभव नाशिल्लो. सुरवातेक हात थरथरले. चूको जांवंक लागल्यो.

एका मिनटा उपरान्त परिस्थिती जाग्यार आयली आनीं धा मिनिटांनीं टण्ण आवाज जावचे आदींच हांवें परिच्छेद टायप केलो.

हे परिक्षेंत दिल्ल्या वेळांत कितल्यो चूको जाल्यात, कितलीं उतरां टायप करपाचीं उरलीं, हाचेर कस लागून निकाल जातालो. कांय दिसांनीं पास म्हणून निकाल आयलो.

उपरान्त हांव 40 speed शिकूं लागलो, पुण परिक्षा जावचे आदीं हायस्कूला़ंत नोकरेक लागलों. खरें म्हळ्यार shorthand शिकतल्यांक 40 speed शिकपाची गरज आसताली.

कम्प्युटर वा लॅपटॉपाचेर टायपिंग शिकिल्ले प्रमाण टायप करप शक्य आसता, पुण मोबाईल घेत पासून हांव इंग्रजी टायप करतां खरो, पुण हांवें शिक्षण घेतिल्ल्या प्रमाण ते़ं ते़ं बाॅट त्या त्या बटणाचेर दवरून टायप करूं मेळणा, कारण मोबाईल आकारान बारीक. म्हणटकच आमच्या त्या सरपंचाभशेन अंगठ्या बॉटानच सगळें टायप करपाची संवंय जावन पडल्या !

By Ranjan Naik