शारांतलो पावस आनीं गांवांतलो पावस हातुंत फरक आसा. म्हजें भुरगेंपण आनीं तरनाटेपण गांवांत गेल्ल्यान म्हाका गांवांतल्या पावसाची वळख आसा आनीं फाटलीं एकोणीस वरसां शारांतल्या पावसाची वळखबी जाल्ल्यान म्हाका फरक जाणवता.

भुरगेपणांत आमीं व्हडल्यांच्या तोणांतल्यान आयकताले पावस बेबकार बसला, पावस म्हशीर बसला. हीं दोन नांवांच भौतेक आयकूं येतालीं. तेन्ना हें आयकून अजाप दिसतालें.

गणपती हुंदरार बशिल्लो दिसतालो. पुण पावस बशिल्लो पळोंवना.

उटंगाराचो पावस पडत जाल्यार लोक म्हणटाले, पावस म्हशीर बसला, कारण म्हसरांक उदकांक रेब्यांत बसपाची उमेद. बेबूक तर भौतेक उदकांत रावपी प्राणी. म्हणटकच दोनूय प्राणी देवा कडेन चड पावस मागतलेच अशें आमी समिकरण करताले.

एकूण हीं दोनूच नांवां आमकां खबर आसतालीं. कारण मोठो पावस पडटा तेन्नाच आमीं नक्षत्र आनीं वाहनांची नांवा याद जातालीं, उपरान्त पावस उणो जातकच पावस कित्याचेर बसला हाची वासपूस करपाची गरजच पडना आशिल्ली.

म्हाका दिसता पावसाच्या दिसांनी शारांत अशे तरेन पावस कोणाचेर बसला हाची वासपूस भौतेक जायना आशिल्ली. म्हाका दुबाव आसा.

आज फेसबुकार एक व्हिडिओ पळंवंक मेळ्ळो. पावसाचें नक्षत्र आनीं वाहनांची म्हायती घेतना अशें लक्षांत आयलें किं, पावसाच्या वाहनांची संख्या आठ आसता खंय. म्हस, गाढव, कोलो, हुनीर, बेबो, मोर, हत्ती आनीं घोडो. नक्षत्र आनीं वाहन पावसाचें आसत जाल्यार पावस भरपूर पडटा खंय.

कोलो उंदीर घोडो गाढव हांकां पावस तितलो चड आवडना खंय म्हणटकच ते नक्षत्राचेर बसत जाल्यार पावस मोठो पडना. पुण म्हस बेबो मोर हत्ती गाढव नक्षत्राचेर बसत जाल्यार पावस चड पडटा खंय. पावस पडपाचें प्रमाण, नक्षत्र आनीं वाहन हाची म्हायती पंचांगांत नमूद केल्ली आसता खंय.

हो लेख बरयतना म्हज्या मनांत एक प्रस्न उप्रासलो तो असो, दर वरसा जून जुलै ऑगस्ट सप्टेंबर ऑक्टोबर मेरेन सादारण १२० वा इल्लो अदीक इंच पावस पडटा.

पुण या पावसाळ्यात चार पांच म्हयन्यांतलो पावस फकत जून जुलै म्हयन्यांतच पडलो. नवे विक्रम प्रस्थापित केले. आनीं मदीं मदीं पावस लागून पडतच आसता.

म्हणटकच या वरसा फाटल्या दोन म्हयन्यांत पावस नेमको खंयच्या वाहनाचेर बशिल्लो काय !

By Ranjan Naik