Ramesh Ghadi
तरणें वत पडलां दारांत
पुरो टिव्ही , विडयो गेमी ..
आख्खो दिस मोबायल हातांत .
मान्शे वयल्यान उडयो मारात
तळ्यांत वचून बुडयो मारात
पाजी वयल्या आंब्यार चडून
झरकुट्यांत मुडयो मारात
शेतांतल्यान वशीर धावात
तणां-कुड्यार उबे रावात
सुटसुटीत जातली कूड
दोंगर चडात..रानां भोवात
फाट मात्शी वतान जळयात
झाडार चडून घोटेर पळयात
कितली मजा भल्ल्या गावांत
शारांतल्या इस्टांक कळयात
दरयार वचून वेळेर धांवात
नाकाक धरून खराक रावात
सांगटेराक मारून झोपय
समदीराचो थाव हाडात.
केगदी- झाडा केलकें कातर
रोबण बांदून मारात फातर
केदनां मजा करतल्यात रे
आयज तुमीं केली ना तर !!!
नाणय गरयो गाठय हायस
थोड्यांक उणें थोड्यांक मायज
तोपे सांगटां खरवो थिगूर
चलात गरोवन हाडया आयज.
काजीर चडून मुट्टे काडात
फातर मारून तोरां पाडात
रानांत वचून कांटा तोडात
बोल्सां भरून चुर्ना हाडात
सायकलीचेर बसून दोट्टी
दोंगरा वयली काडात चट्टी
कट्टी भरून पियात निरो
धुंवता अजून काजु भट्टी…
गांवांत कितली भल्ल्या मजा
कोळमेर वचून बियो भाजा
घरांत बसून नाकांत रावोंक
वाट पयता सैम राजा..
वाट पयता सैम राजा
Manoj Kamat
