Ramesh Ghadi
जांत्यार दळत होवयो गायत
मुसळां फारार घामान न्हायत
सुरान दर्या-गितां गायत
दिस परत येवचे नांत
ते दिस परत येवचे नांत.
सेतेम्ब्राच्या वतान जळत
कुतेलाची आवडा मळत
खांडये-कुंबात भात साकांत
माथ्यार घेवन धावपाचे रे
दिस परत येवचे नांत
ते दिस परत येवचे नांत.
घामाच्यो रे पावळ्यो गळयत
वोसाडीचेर ल्हारा खेळयत
तिख्या-हाता कांबी नेटार
रांपण काण्ण्यो वोडपाचे रे
दिस परत येवचे नांत
ते दिस परत येवचे नांत.
खिणाल हातांत पोयों कापीत
पोये माथ्यार दाभणीं धापीत
शिवणी तालार खांपा-माडार
पाखे कशे चडपाचे रे
दिस परत येवचे नांत
ते दिस परत येवचे नांत.
पिकासानी आगर खणीत
खांवट्या-धोलींत चिखल वोडीत
जरगतीच्या काळखे रातीर
नुस्तें दिपोवंक धावपाचे रे
दिस परत येवचे नांत
ते दिस परत येवचे नांत.
निडराची जिण जियेत
निखळाचो निस पियेत
निकटांचो साथ केदीच
जिवितभर ना सोडपाचे रे
दिस परत येवचे नांत
ते दिस परत येवचे नांत.
Manoj Kamat
