Uday Mhambro
वयल्या वाड्यार
मदल्या वाड्यार
गांवच्या तिठ्यार
जाकीनाल्या बांदार
सदुल्या गाड्यार
बुलील्या गिरणीर
कामतील्या पसर्यार
दिगुल्या हॉटेलार
माडकांतल्या व्हाळार
तारीपाणट्यार
अनंताचे तळयेर
वचत थंय
पळयत थंय आयज
लोकूच लोक दिसतात
तरेकवार रंगाचे
वेगवेगळ्या मोदिचे
नवेताल्ल कपडे घालून
लोक मोठे उमेदीन बोवाळटात
एकामेकांक हटकीतात
भुरग्याबाळांची खबर घेतात
कोण भेटो हाडटात
कोण भेटो पावयतात
कोण ह्या निमतान साग्वाद दितात
तर कोण परबो दितात
आयज गांवात उमेदीचे वारे
वचत ताच्या कानांत भल्लां
वाड्यावाड्यार उत्सवाचो बाजार फुल्ला
शारांतल्यो सगळ्यो गाडयॊ आयज
वाट विसरून गावांत पावल्यात
आयज गावांत गाडी दवरुंक जागो ना
दवरलेली गाडी काडपाक लेगीत शक्य ना
वर्सान एकफावट गांवचे भाग्य उदेता
चवथीचॊ गणपती देड दिस गावांत रावपाक येता
शारांतल्या लोकांक
तांचो एक गांव आसा हाची याद दिता
गावांत तांचे घर आसा
गांवचे मातयेंत तांची पाळां आसात
हाची याद करून दिता
देड दिसाखातीर जायना
गाव मनमेकळो हांसता
शिरंतरांनी फुलता
By Uday Mhambro
Manoj Kamat
