Guadalupe Dias
विसरायेचे वाटेर एक
आयज परत फुल्ल्या सांवर
सांगता जशी मेल्ल्या म्हज्या
सांवरी बाये तुजीं-म्हजीं
वेगळीं हांगा जिणें कोंतां
फुलांक म्हज्या मोलायतना
भागाक येतलीं म्हजीं खतां
बोडकी जावं श्रुंगारीत
मनयता तूं सुवाळे
धाडस कोणांक विचारूंक
कसले तुका दुवाळे
बंदनाचो हार घालून
समाज म्हजी करता पुजा
मुक्त स्वास घेतलोच जाल्यार
कुस्व्याक म्हज्या शापीत सजा
त्या मानान तुजें बरें
मनां प्रमाण तुजो भेस
कापसा बोंडांक विचारता कोण
खंयचो गांव खंयचो देश
दिसता म्हाका तुजे वरीं
भान सोडून फुलचें हांवें
सांग इतलें धाडस कशें
खंयचे देवीक भजली तुंवें
पुरो! ह्या फुडें आनीक
अस्तुरेचो जल्म नाका
हिशोब विसरून वाटेवयली
सांवर जावंची आसा म्हाका
By Guadalupe Dias
avinash kunkolkar
