Guadalupe Dias
भूरगेपणार शेंताबांदार
इश्टांवांगडा सारले खीण
जांबळीमुळांत जांबळा खायत
रंगयाळी केल्ली जीण
वय वाडलें सगळें सांडले
सांडले बांद सांडली शेंतां
सांडले बैल सांडली जोतां
सांडले सगळे इ्श्ट तरी
काळजार अजून जांबळी खतां
तांबडी भीण्णा दीकाळ काण्णां
खातना जिबेक वेगळीच मजा
दोंगरावयले काणगीणी
पावस घाल गे सायबीणी
इश्टांवांगडा केल्ली पुजा
आयलो पावस भरलीं तळीं
उदक जालें जळींमळीं
भीण्णा खावन तांबडे जाल्ले
इश्टांचे चेरे सोदता़ं
सांडले बांद सांडली शेंतां
सांडले बैल सांडली जोतां
सांडले सगळे इ्श्ट तरी
काळजार अजून जांबळी खतां
दोंगर माडयत वाटो घडयत
इश्टागतीक आयिल्ले फांटे
केळी पानार सुखा वांगडाच
दुख्खाचेय केल्ले वांटे
दोंगर जाल्यात बोडके
काळजाचेय हजार कुडके
इश्टांवांगडा माड्डयले वांटेर हांव घुस्पतां
सांडले बांद सांडली शेंतां
सांडले बैल सांडली जोतां
सांडले सगळे इ्श्ट तरी
काळजार अजून जांबळी खतां
शितळ वारो उदका झरो
खोशयेक आमचे नासलो अंत
हांसत-हांसत वोंवळां पोडाक
गुंथली आमी आमची खंत
व्हडीं सोडलीं पावसांत भीजत
लजे झाडांवरी लजत
पीराय वाडल्या
फकत एकदांच भुरगें जावंक आशेंता
सांडले बांद सांडली शेंतां
सांडले बैल सांडली जोतां
सांडले सगळे इश्ट तरी
काळजार अजून जांबळी खतां
By Guadalupe Dias
Manoj Kamat
