घामा – कश्टांतल्यान रुजिल्लें
मायेतल्यान उपजिल्लें
सैमाचें आंगण
सुखाचें धन
झाडांच्यो विंगड परी

आंबो – फेर्नांद, दुलबाद, आफोंस, कुलास
पणस, जाम, पेर, केळी
पातळील्ल्यो जळी- मळी
अनसांच्यो आळी
व्हांवपी वजरो दोंगरा वेंगेंतल्यान
निखळ निळ्या मोगा सयेंतल्यान
शिपणें कश्टा वल्लेंतल्यान…

माडयो भरगच्च नटिल्यो
सुपारे पोरांक वाडयत कुसव्यांतल्यान
तांचेर नटपी मिरवेल
घोंस सजिल्ले पानां- पानांतल्यान

पांचवे, हळदुवशे, तांबशे
पिकपाची वाट पळयत
माडांची तर तराच वेगळी
तरतरिल्ले पांच कडानीं
पेंडी हांडीर धरून
पिसुंदराचे मायेंतल्यान फुटपी पोंय

आनी पोयेंतल्यान चोर नदरेंतल्यान तोंड भायर काडपी शेंवक
आडसरांचे पोपटी पिपळे
धाल, म्हाल नाल्ला पेंडी
चापाचे उदेल्ले आंकडे
नाल्लांचे मेजिल्ले शेंकडे…

शांत सायेंत सैमाचे मायेंत
पसवल्ल्ये जिणेचे कायेंत
हांव सैमाच्या पांगरुणांत केन्नां रिगलों कळ्ळेंच ना
धर्तरेचे वेंगेत सांसणाखातीर…

कविता संग्रह : ‘आत्म- ब्रह्म’

By Manoj N. Kamat