हे रामा
जैताचीं पर्वां जोडूनलेगीत
मनशान जें विद्रूप
मुखें घालां
पातकांचीं पारायणां
करपाचो हट्ट धरला

हो आतंक
उपकार करून
ब्रह्मास्त्रान आड उडय
अगस्त रुशिच्या उपकारांत
सासणाक आमी रावुया
काळखांतल्यान उजवाड सोदुया

हे सीते
तुवें आपणाचोच न्हय
पुराय अस्तुरेच्या राखणेचो
निश्चेव केल्लो
पूण आयज रावण रुपी
अत्याचार नां नपयत करपाक
समाज उणो पडला

तिरजटेच्या रुपान
अशोकवाटीका राखपाक
तुजे शक्तिनिशीं
पुराय आस्तुऱ्यांक तूं
फाटबळ दी
धर्तरेच्या रिणांत आमी रावुया

हे लक्ष्मणा
आपल्या भावापासत
ऊर्मिलेक फाटल्यान दवरून
तूं रानां – वनां भोंवलो
आपुलकाय आनी मायेन वावुरलो
दुस्मानाक शिमे पलतडी दवरून

खुमो राखपाखातीर
लक्ष्मण- रेखा ओडपाकलेगीत
फाटीं रावलोना
तुजी निश्टा आनी स्रद्दा जपतना
अधाशी समाजातल्या
भ्रश्टाचाराचें नाक
तूं शुर्पणका समजून
कापून उडय

हे भरता
राज्य मेळिल्लें आसतना
त्या पुण्यात्म्याच्यो पादुका
आसनाचेर दवरून
ताची पुजा करपी तूं शिरवंत
आयच्या समाजांत
सुशासन हाडपाचो यत्न कर

आनी कैकईचे मंतरेची वान्सा – लोभ
सासणाखातीर
सत्ताधिशांच्या मनांतल्यान
काडून उडय
तांणी आपल्या देशाची सेवा
आदरभावान करीत रावूं

हे हनुमाना
तूं निस्वार्थी दूत
जो त्या पुण्यात्म्याच्या
पायांकडेन सदांकाळ
निस्वार्थीपणान रावलो

त्या शिवाची
शक्त तुजे कुडींत
आसून लेगीत
अवताररुपी विष्णूची
सेवा केली

असोच समाज सुधारक
आयच्या काळांत जल्मुचो
जो हेरांखातीरूच झरचो
आनी समादानी जावचो
दिव्य रुपान
हो समाजातलो
लोभी, क्रूर, पातकी, अविचारी
आतंकी रावण

आमी तेन्नाच मारूंक पावतले
कुंभकर्णाची महाकाय शक्त
आनी मेघदुताची माया तोडून
एक नितळ समाज घडोवंक पावतले

हो लक्ष- भेदपी बाण
पातकांचो विनाश करून
आमचे जिणेंत तेन्नाच
तेजिश्ट उजवाड हाडटलो
निर्मळ, नितळ, उर्जेन भरिल्लो

By Manoj N. Kamat